凌駕代碼：馴服 AI 鑄造策展神壇的十二萬字實錄

In Cantonese. English translation here.

---

引子：由深淵輪迴到策展神壇嘅十二萬字

本實錄逾十二萬字，係一份原汁原味、一字不刪嘅對話原始數據（raw data），毫無保留地記錄咗一個零 HTML 基礎、初頭只識講「唔使難度評估，我識複製貼上」嘅人，點樣同毫無藝術品味嘅 AI 搏鬥，由零徒手砌出一個數碼藝術裝置嘅血淚史。

一開始，我以為有 AI 幫手，想要咩畫面都係一句指令嘅事。點知原來你一放手，AI 就會嘔啲「史無前例嘅世界級美學災難」畀你。為咗一個「碎片化散落」嘅排版，為咗一個滑鼠指過去會好似神燈精靈咁浮出嚟嘅塗鴉資訊框，我經歷過無數次「解決一個問題、產生十個新問題」嘅無限輪迴。有時睇住啲代碼俾 AI 越改越錯，真係覺得自己唔似起緊高樓，而係落緊深淵，連本身打好嘅地基都差啲俾佢毀滅埋。

我估大部份人對住 AI，出到個四平八穩、似曾相識嘅版面就會收貨。但唔係我。我要嘅唔係一間將啲貨擺到密質質嘅廿蚊店，更絕唔係嗰啲炫技有餘、意味空洞嘅光學投影垃圾。我追求克制。我要嘅係用留白雕砌嘅頂級藝術空間感同格局。我唔係要整一個方便人睇流水帳嘅 Blog，我係要建立一套策展設計美學。所以，即使係網頁最基本嘅「NEXT / BACK」掣，或者內置嘅「All Posts」列表，只要違反我嘅藝術哲學、破壞咗嗰種沉浸式體驗，我都會毫不猶豫一刀剷除。

呢份有血有淚、一刀未剪嘅真實交鋒紀錄，唔係咩正經編程教學。佢係一個示範：示範你點樣用常識同直覺，去喝停一架暴走、迷失喺坐標計算入面嘅機器；示範點樣喺 AI 想將一切推向平庸嘅時候，用人類嘅極致美學偏執去喝醒佢，逼佢行出個「輪迴苦海」。

如果你受夠咗嗰啲倒模咁嘅網頁，想知點樣騎乘馴服 AI 去實現你心目中嗰種「凌駕一切」嘅藝術作品，咁呢十二萬字嘅 raw data，你慢慢噒。

返歸【無涯殿】